(07.01.2001)  Verkfalli framhaldsskólakennara lokið

Nú um kl. 19.30 var undirritaður nýr kjarasamningur milli Félags framhaldsskólakennara og samninganefndar ríkisins og frestast verkfallið þar til búið er að greiða atkvæði um nýgerðan kjarasamning.  Kennsla hefst því á ný í framhaldsskólum landsins eftir tæplega 9 vikna langt verkfall, sem er eitt lengsta verkfall síðustu áratuga á Íslandi.  Ljóst má vera að áhrifa þessa langa verkfalls mun gæta mjög í öllu skólastarfi næstu mánuði og jafnvel ár, ekki hvað síst í stærðfræðikennslu.  Stærðfræðin er mörgum nemendum erfið og góður árangur byggir oftast á nákvæmum lestri reglna, skilgreininga og sannana auk mikils dæmareiknings og yfirlegu.  Árangur næst því að jafnaði ekki á stuttum tíma og nú þegar minni tími er til ráðstöfunar er hætt við að það komi einkar illa niður á námi í stærðfræði.  

(15.10.2000)  Stærðfræðikeppni framhaldsskólanema

Hin árlega stærðfræðikeppni framhaldsskólanema verður haldin að morgni þriðjudagsins 17. október.  Keppnin verður með líku sniði og undanfarin ár.  Hún er tvískipt, annars vegar neðra stig fyrir nemendur á 1. og 2. ári og hins vegar á efra stigi fyrir nemendur á 3. og 4. ári.  Verkefnin eru leyst án hjálpargagna og eru tímamörkin 2 klst á neðra stigi en 2.5 klst á efra stigi.   Sigurvegarar á hvoru stigi er tryggð þátttaka í Eystrasaltskeppninni sem fer fram í Osló snemma í nóvember, en hvert land sendir fimm keppendur.  Tuttugu efstu á hvoru stigi öðlast þátttökurétt í lokakeppninni sem haldin er næsta vor.    Þeir sem þar standa sig best taka þátt í Norrænu stærðfræðikeppninni sem fer fram samtímis á öllum Norðurlöndum.   Hápunkturinn er svo Alþjóðlega ólympíukeppnin í stærðfræði sem verður á næsta ári haldin í Washingtonborg.  Þangað verða væntanlega sendir sex keppendur á grundvelli keppnisferils vetrarins í stærðfræði.  Hægt er að skoða og sækja verkefni fyrri ára ásamt lausnum þeirra hér.

(07.10.2000)  Ný sönnun á setningunni um fjóra liti

Setningin um fjóra liti var fyrst sett fram árið 1840 af Möbius og síðar einnig af DeMorgan og Guthrie bræðrum árið 1852 og enn aftur af Cayley árið 1878.  Hún segir í stuttu máli, að ekki þurfi að nota nema fjóra liti til að lita landsvæði þannig að samliggjandi svæði hafi ætíð ólíka liti.  Sú staðreynd að ekkert landakort hefur fram til þessa þurft meira en fjóra liti virðist benda til réttmæti þessarar kenningar, en sönnun hennar hefur reynst afar erfið og mikið verið rætt um þann vanda í gegnum tíðina. 
Hún var sönnuð með aðstoð tölva árið 1977 af Appel og Haken.  Þeir þurftu að nota 1200 klst. af tölvutíma til að vinna í gegnum öll smáatriði sönnunarinnar.  Þetta var fyrsta mikilsverða reglan sem sönnuð var með aðstoð tölva á þann hátt, að ekki var hægt að sannreyna hana beint nema með tölvunotkun.  
En nú hefur indverski stærðfræðingurinn Ashay Dharwadker komið fram með sönnun sem byggir á grúpufræði og kerfi Steiners.  Þessa sönnun má skoða á heimasíðu hans hér.